vefritið

Lýðræðishefðin er rík innan Háskóla Íslands og kemur einna best fram í Stúdentaráði, ráði sem stúdentar sjálfir velja í lýðræðislegum kosningum og sér um að berjast fyrir hagsmunum þeirra. Svo virðist sem áhugi stúdenta á störfum í þeirra þágu sé að minnka eftir því sem samfélagið verður opnara og margþættara og fjölmiðlun meiri og skarpari. Við því er eðlilegt að bregðast, m.a. með því gera þeim sem eru í forustustörfum á þessu sviði kleift að hverfa af vettvangi með sæmilegar einkunnir og án þess að þær þurfi að líða fyrir starf í þágu stúdenta.

Tillaga mín
Til þess að bregðast við þessu finnst mér eðlilegt að veita fulltrúum stúdenta (bæði í Stúdentaráði og nemendafélögum) nokkra undanþágu frá námskröfum. Þeir vinna að hagsmunum stúdenta og þar með háskólans í heild sinni er illfært að einbeita sér fullkomlega að námi sínu. Þar með eru möguleikar þeirra á vinnumarkaði að námi loknu skertir vegna vinnu þeirra í þágu stúdenta og menntunar á Íslandi. Vegna þessa þykir mér eðlilegt að lækka lágmarkseinkunn fulltrúa nemenda á lokaprófum og gefa að auki eftir í verkefnaskilum og mætingu í verklegum tímum þar sem við á.

Vandasöm störf
Kröfur um námsárangur til fulltrúa stúdenta í Stúdentaráði, nefndum þess og í nemendafélögum yrði með þessu nokkru rýmri en almennt tíðkast. Ætti það sér þá skýringu að um ræðir embætti og störf í þágu stúdenta allra sem eru vandasöm eftir því. Fulltrúar í Stúdentaráði þiggja umboð sitt til starfa beint frá stúdentum í almennum kosningum og sækja endurnýjun þess árlega. Sama gildir í raun og veru um stjórnir nemendafélaga. Það er því lýðræðisleg nauðsyn að svo sé búið að þessum embættum og störfum að það hvetji til þátttöku í þeim og að þeir sem verja meginhluta námstíma síns til starfa á opinberum vettvangi og gegna þar trúnaðar- og forustustörfum geti gert það án þess að hætta námsárangri sínum. Það er líka mikilsvert í lýðræðisþjóðfélagi að ungt efnisfólk gefi kost á sér til starfa í þágu stúdenta og þurfi ekki að tefla hag sínum í tvísýnu með því að verja tíma sínum frekar í slíkt en til náms á stundum.

Heimild: Greinargerð með frumvarpi til laga um eftirlaun forseta Íslands, ráðherra, alþingismanna og hæstaréttardómara. (http://www.althingi.is/altext/130/s/0635.html, fyrir neðan lið h).